Beautiful baby

كلام كداب

كلام كداب

بقلم — وحيد ابراهيم :

كلام كداب

وحشتينى
كأنك مش قصاد عيني
أنا معرفشى من إمتى
بقيت كداب
ومن إمتى بقي احساسي
فيه دهشة
ومن إمتي باقابل نفسي
باستغراب
وباسألني
أجاوبني
مفيش اسباب
وايه تفسيرى للدقة اللى
مش ع الباب

وحشتينى
دى كلمه عاوزه تتراجع
ونعرف مين مؤلفها
وايه معناها وازاى تنكتب ف كتاب
مفيش اسباب عشان تتقال
ولا فيه ليها أى مجال

وحشتينى
بتيجى الكلمة على بالى
باحس انى انا غلطان
والاقى حاجات كتير فيا بتصرخ
تشتكى م الحال وبتلومنى
وبتقوللى بلاش تتعدى ع الإحساس
كلامك مش سليم خالص ولا له أساس
دى أول كلمة تنطقها بلا معنى
بيصرخ منها حرف الشوق
ومعنى الحب
وبتقتل جمال الآه
وتوئد كل أحلام الغزل فى الروح
وبتخللى الجراح تكبر
وبتسيب الأمل مجروح
بلا ش تنطقها من تانى ولو حتى مكانها فراغ
دى كلمة عاوزة تتعاقب
عشان عدت حدود القلب والأعضاء
وراحت أرض غير صالحة
ونزلت بحر شعر جديد
حروفه كلها مالحة
بقت تفعيلة مش فالحة
وقتلت شعرك الغندور
عرفت انك ولا شاعر ولا معذور
جريت ورا كلمة فتانه وبنت حرام
فاوقع المعنى فى المبنى
ووقع النثر فى الموزون
وحل مابين قصايد شعرك المتحنى بعيونها
خصام وظنون
أيا كلمة وحشتينى
يابنت الإيه
بلاش تيجى لإحساسى ولا تعدية
ولا تحاولى تكونى فيّا شئ ملموس
انا ملبوس بها عشقا
ولا عاوز مشايخ عشق يرقونى
دانا عيونها بيسقونى
ندى المشوار
ويدونى لبكرة نهار
عشان هيه ماهيش غيرى
ولا خارج حدود الدار
انا وهيه عبارة عن شعور واحد
ودين واحد
فلو راحت حبيبتى الجنة
يبقى مستحيل انى
هاروح النار

 

شارك برأيك وأضف تعليق

Beautiful baby

أحدث التعليقات