Beautiful baby

#دنيا محيراني وزمانها بكاني

  • شعر
  • 20 يوليو 2020
  • 191 مشاهدة
#دنيا محيراني وزمانها بكاني

 رايحه فين بينا يادنيا تاني

غمقت ايامك وزماني بكاني

كنتي زمان محيراني

شويه عليا ومزعلاني

وشويه معايا ومفرحاني

يعني بقاسي منك وبعاني

واحياناً شيطانك ينساني

دلوقت علطول تعباني

وبسكينك التالمه دبحاني

ضعف فيكي الحنين ،

وقوي الأنين

وذاد مرار طعم السنين

عايزانا نعمل ايه ماتحكيلي!!

نرضيكي اذاي بس ؟؟!!…..قوليلي ؟؟!!

جنب الحيط ماشيين

وبرضوا مش عاجبين

ايه يادنيا ؟؟!! نمشي شمال علشان تفرحي بينا

نسرق ونظلم ساعتها هاترضي علينا

امال ايه طيب ؟؟!!! ماترسينا !!

علي حوارك الخايب وتفهمينا

الظالم معاكي راسه مرفوعه

واثق في نفسه وكلمته مسموعه

لا بيهمه سلطه ولا قانون

واللي يعوزه في لحظه تحت رجله يكون

والنصاب فيكي بيسموه شاطر

وبتعمليله الف مليون خاطر

يعني اللي ماشي يمين

شايل الطين

واللي ماشي شمال حاله عال

حرام عليكي جننتينا

تقلت احمالك وكسرتينا

وجوا همومك رميتينا

وكل هدفك تذلينا

وعايشين فيكي تايهين

لأحوالك مش عارفين

ولا بألاعيبك دريانين

من الأخر كأننا ميتين

في القبور مدفونين

ومع الزمن منسيين

ومحدش حاسس بينا ولا متشافين

حقنا دايماً مهدور

وضهرنا فيكي مكسور

ولما فكرنا نثور

(ضحكوا علينا وادونا دور غير الدور)

بعد ما كنا احنا سبب التغيير

وقولنا بعد الثوره هاييجي الخير

ركب علي ضهرنا الغير

فهمونا انهم معانا

وحاسيين باللي جوانا

واحنا غلابه صدقناهم

ولكل حاجه سلمناهم

والنتيجه انهم خانونا

اتاريهم كانوا بيستغلونا

سرقوا ثورتنا وقتلوا احلامنا

خربوا بيوتنا وخرسوا اقلامنا

ورجت بلدنا مية خطوه لورا

ياريت اللي جرا ما كان جرا

ورجعنا تاني مجرد تابعين

اداه في ايد شوية ملاعين

لو احتاجونا في عيونهم يشيلونا

بس تخلص المصلحه اشر طرده يطردونا

ملعون ابوهم تعبونا

وبأساليبهم القذره دمرونا

حتي شبابنا علموهم الادمان

طلعوهم جيل جبان

مش بيفكر غير في المخدرات

والبلد وخيرها سابوها للبشوات

وهو ده اللي هما عايزينه

يشغلونا عن اللي هما واكلينه

مالبلد وخيرها في بطونهم

ومحدش مستفاد منها دونهم

ربنا يتدخل ومنهم يحمينا

وينقذنا من شرهم وينجينا

ويرجعلنا حقوقنا في دنيا جت علينا

ملناش غيرك يارب انت سندنا وكل مالينا

#منسي

شارك برأيك وأضف تعليق

Beautiful baby

أحدث التعليقات