قادر يحوش

من ابداعات الشاعر محمد الدليل :

————-
مين اللى قال ؟
الشمس راحت ودعت حضن السما
وسابت لنا الليل الحزين
وان القمرفارق سمانا وارتحل
سافر بعيد
وان الأمل ساكن فـ حضن الليل شريد
مين اللى قال ؟
البحر أمواجه علِت
طلعت تناطح فـ السما
ع الشط كام مليون غريق
واللى نجا هو الشهيد
سافر لجنة ربنا
وفـ جنته عايش سعيد
مين اللى قال ؟
إن الشيطان عايش وساكن وسطنا
وفـ كل بيت واحد بيتبع خطوته
بيعلمه ازاى يخون حلم الوطن
ويكرهه طعم السجود
مين اللى قال ؟
الرحمة ودعت القلوب
سكنت فـ أحضان الجبل
ويا الوحوش
وان الوحوش ما بيرحموش
واكلين لحوم كل البشر
ما ببشبعوش
حلم الشهيد فوق النعوش
شكى ووصلت شكوته لرب السما
رب السمــــا قادر يحوش
محمد الدليل من ديوان
همسات الدليل